सत्यमेव जयते
फार्मर कप 2026

सत्यमेव जयते फार्मर कप म्हणजे काय?

फार्मर कप ही पानी फाउंडेशनने आयोजित केलेली, शेतकरी गटांमध्ये होणारी, गटशेतीची एक स्पर्धा आहे. ज्यामध्ये शेतकरी आपले पीकनिहाय गट तयार करून, स्पर्धेच्या 'स्मार्ट शेती' ऍपवर त्याची नोंदणी करून, स्पर्धेमध्ये भाग घेऊ शकतात.

शेतकरी गट तयार करण्याची आवश्यकता काय?

शेतीत समस्या अनेक असतात. बी-बियाण्याचं संकट, खताचं संकट, कीड आणि रोगांच संकट, बदलत्या हवामानाच संकट, बाजारात होणाऱ्या चढउताराचं संकट, इत्यादी. या सर्व संकटांशी एकट्याने लढणे अशक्य आहे. परंतु जर एकच पीक घेणारे शेतकरी गटाच्या रूपाने एकत्र आले, तर त्यांची एक मोठी सामूहिक ताकद तयार होते, जिच्या जोरावर शेतीतल्या सर्व संकटांना तोंड देण्याचे सामर्थ्य सर्वसामान्य शेतकऱ्यांमध्ये निर्माण होते.

हा फक्त विचार नाही तर हे सिद्ध झालेले आहे.

गटशेतीतून निर्माण होणाऱ्या सामूहिक ताकदीचा प्रत्यक्ष अनुभव महाराष्ट्रातल्या हजारो शेतकऱ्यांनी स्वतः घेतला आहे. साल २०२२ ते २०२४ या तीन वर्षांमध्ये महाराष्ट्रातल्या ४६ तालुक्यात, 'सत्यमेव जयते फार्मर कप'च्या माध्यमातून ४,००० पेक्षाही जास्त शेतकरी गट तयार झाले. गटाच्या रूपात शेतकरी एकत्र आल्याने त्यांची शेती पार बदलून गेली. अनेक शेतकऱ्यांचे उत्पादन हे दुपटीपेक्षाही जास्त झाले, खर्च निम्म्यापेक्षाही कमी झाला, आणि नफा प्रचंड वाढला.